Koti wa Makueni niwaumya mwiao mwii umwe ula andu ma musyi meliawa ta mauthikie utewoo nduani ya Kitende kauntini ya Makueni umbuwe muthenyani wa uni nikana wikiwe ukunikili kana ni wa andu ma musyi ungi ala maaisye mwii wa mwendwa woo sivitalini wa Makueni Referral Vakuvi syumwa Ili mbitu.
Ni itina wa maovisaa ma DCI kusikata ikoani makulitye koti umye mwanya mwii usu uvukuwe, andu ma musyi usu ala mathikanite masyoka meethia mwii ula watiitwe nyumbani ya kusuvia mii ya akwu ya sivitali wa Makueni Makueni refferal ni wa mundu woo na tiula mathikite.
Musili wa Makoani kotini wa Makueni Hon Kimei aumya mwiao mwii uyu ikivukuwa misyi ii yeli yothiwe vo, vala wasya utungwe sivitalini wa Makueni referral wikiwe ukunikili wa metho kana ene nimatonya kuumanya kwa kusyisya, na eethiwa uimanyika, koti ukaumya utwio iulu wa itambya yila yailite kwoswa.
Koti ingi niwaumya mwiao iseso ya kuvukua mwii uu yiungamiwe ni Ovisaa ula umasya miao kiseseni kya volisi kya Makueni na ripoti ikatungwa ingi kotini usu matuku 30 ma mwai uu ala me auke wakatano.
Musyi wa mututia Waema Muthusi kuma nduani ya Kilanga ,Kithoni okauntini ino ya Makueni, mayaaisya uthika mwii wake itina wa mwii usu kwaiya nyumbani ya kisuvia mii ya akwu sivitalini wa Makueni referral vala mena wikwatyo kana niutonyeka kwithiwa newo usu wathikiwe nduani isu ya Kitende.
