Mwii wa ula mutumia andu ma musyi wake kuma nduani ya Kitende kuya Mii subcountini ya Nzaui kauntini ya Makueni manauthikite utew’o niwavukuwa kwi umunthi itina wa koti wa Makueni kumya mwamulo mwii usu uvukuwe.
Mwii wa Waema Nguku Muthusi waaie nyumbani ya kusuvia mii ya akw’u ya sivitali wa Makueni kaunti referral na andu ma musyi matwie mayiumantha vala itina wa kuvukuwa andu ma musyi maikiithya kana mwii uyu niw’o wa ithe woo.
Andu ma musyi uyu ula ithe woo utwie uiyitwe nyumbani ya kusuvia mii ya akw’u ya sivitali wa Makueni kaunti referral nimaikiithya kana ithe woo niwe usu wi nyumbani ino ya kusuvia mii ya akw’u ya sivitalini uyu na maweta kana niw’o manathikite mwii ute woo vala mamikayia serikali imatetheesye kumbania na kuthika ithe woo maiweta kana nimanalikile ngalama nene kumbania na kuthika mwii ute woo.
Andu ma musyi wa Waema Nguku Muthusi nimaweta kana matwie na kiuuyu itina wa kwasya mwii wa ithe woo ateo kiuuyu yu nikyavutika itina wa kukwata mwii wa ithe woo.
Koti kwi uni niw’o weteelete livoti ya kuvukuwa kwa mwii uyu ni kana inengane lingilia ya musyi uyu ukathike mwii woo.
