Munini wa president Rigathi Gachagua niwakulya enenthi mamanyie uneeni wake wa uw’o.
Gachagua aneeena kii itina wa uthaithi kanisani umwe wa AIC ula wii Uasin Gishu aiweta kana ala meuvinga uneeni wake ula waumisye itina wa kuithwa wia ta munini wa president kukonya nthi ya Kenya kwithiwa itena ilovia kumana na utongoi muthuku mamanye niwaw’o na maisuania kwa vamwe kuukilya na kutuungiiyaukwati wa Kenya.
Niwaweta kana Akenya kwithiwa matena mawia na mikovo mingi yoothootheete ukwati kutheeya, aiweta kana president William Ruto niunaanyamaitwe, akavuthwa na kuvathwa vaasa na utongoi ula wokitiiye vanene ateo maekea ala mamunyamaisye.
Nake ula wai gavana wa kaunti ya Ilovi Mike Mbuvi Sonko niwaweta kana nimaekeiye ala manaamunyamasyaa Dr. Ruto ateo ala makonanitwe na ulusani na utumii wa mali ya mwenenthi ta ilovia ssya KEMSA matunge kana mosewe matambya mavyu ma kii miyao.
Ndongoi ingi syivikite uthaithini usu wa kutunga muvea nivamwe na spika wa mbunge nene Moses Wetangula, Ndongoi ya aingi mbungeni nene Kimani Ichungwa, minista mwoloote muviani wa ukui na malelu Kipchumba Murkomen kati wa ndongoi ingi sya kiuteti.
Nake Komishena wa Rift Valley Mohamed Maalim niwaikiithisya ekali ma kisio kiu kana nimeuthukumana kwa vakuvi na atongoi asakue kisioni kiu kutuumanya muuw’o ula withiitwe uiviingiswa na ala moyaa indo.
