Minista muviani wa kisomo Prof. George Magoha yu enda misivi ya kwonanya andu maimanyana kii mwii mitandaoni ikunwe muungu vaa Kenya ni silikali yivo kana ila ikooka itina.
Aineena ivindani ya kuviinguuwa kwa mautanu ma kwina mbathi ala matwaiiwe Kisumu, Magoha niwaweta kana ona kau mutandao niwailitye maundu ma kisomo, maweeku maw’o nimaile kumulikwa muno.
Ingi easya kana we ndeumakwa nikuwetwa ta utongotye kwa kithui nundu etetea uni wa nzyawa ila syivo.
Mwakani wa 2020, Magoha niwasukumiite nzama ya maminista vamwe na president mitandao ila yonanasyaa misivi ya waai ikunwe muungu aiweta taikonetwe vanene na ukui wa mavu wa syana sya ukuu munini.
