Ndongoi sya ulei nisyakulwa kunenga silikali nzau ungu wa utongoi wa president William Samoei Ruto yanya iseo ya kuthukuma mwenenthi na kwianiisya mawatho mayo.
Ni ndeto ila syawetwa ni Ambassador Kiema Kilonzo nthini wa valua kwa nyumba sya mauvoo, aisungia uneeni wake ndongoi ya kyama kya Wiper Stephen Kalonzo Musyoka ila unaaneenie kyumwani aivuthiisya utongoi wa Ruto, matuku mavuthu alika kivilani.
Kilonzo niwaweta kana Kalonzo aile ni kukunikila ivindani yila waithiwa silikalini vala uneekunie kithui kuthukuma nayo Kuma mwakani wa 1985 nginya atwikithwa munini wa president mwakani wa 2012 na itina aweta wandani akethiawa mundu wa moko wa president unathyumuiye wiya Uhuru Kenyatta ateo amutula muti kwa kulea kuthinikia kisio kya Ukamba vala maundu ta yua na ujya syikiinyiite vanene.
Ovaluani usu niwamukaathiiya Dr. Ruto kwa kivathia ilembeta ya Ukamba myanya ya maminista ana evo Dr. Alfred Mutua- maundu ma nthi sya nza, Peninah Malonza- utalii na Monicah Juma mutai maunduni ma useeseeyi na kwithiwa anatheeisye thoowa wa mbolea ila ikwithiwa iyailya uimi na kuukitana na nzaa atena kikono kya undu wakwatie kula Kuma kisioni kii.
Kiema niwaweta kana enenthi nimanaasakuiye ndongoi wina muikiiyo kana nikutwaa Kenya mbee vate ivathukanyo, ainyungunyisya utongoi wa Kalonzo ula ukuweta niwa kithui kwa kwithiwa Wiper itaanengane ivuso kwa enenthi isioni imwe kutwaiisya muthungululo, undu ula waimie mwenenthi haki yake ya unyuvi na akathiiya muvea wa Makoti kwa kuungama na u’wo.
Niwaweta kana ivinda ya ngavano na uteti niivititwe ni ivinda aiweta muikiiyo wake kwa Ruto kwailya ukwati wa Kenya kwisila mitalatala wa bottom up economic model.
