Gachagua aneena kii yila eikomanite na nzama nyuve kuthiinikia mutalatala usu vala waweta kana silikali nikuikiithisya alimu mawiithyululuko maseo ma uthukumi.
Okavindani kau niwakulya nzama isu kuka na mawoni maw’o na mena uuniko kwa asyai, amanyiwa na alimu na aweta kana muvia wa kisomo ndwiikonwa maunduni ma kiuteti ta vau mbeeni aikulya alimu kwikia kithito wiani woo.
Gachagua niwatumia ivuso yiu kukaathiiya uthukumi wa kwiiyumya wa Prof. George Magoha ula withitwe na wio muviani wa kisomo aiweta kana silikali ndina muvango wa kumukuthua mituki onakau niwendete ndeto ila syaataniwa ni Magoha aiweta mwei niwathela meo uvisini na kuvikiiya maminista eu malike uvisi eo uvisini, aiweta ni useo vayiithiwa na itwiku ya kiutongoi silikalini na miviani kivathukanyo.
Magoha ula uwetete niukusyoka kilasini kusomethya university vala watuaa easya ena kiwuyu kwona imanyisyo nene syendeeye nai kwa kwithiwa itena miiyo ila yaile kwailya kisomo.
Oingi niukulilye nzama isu kutumia ui kukunikila maundu kii nthini ala matonya kwailya kisomo kiu na kuuna amanyiwa.
